स्वास्थ्य शिविरमा हजारौंले लिए सेवा

चारपाने।

झट्ट हेर्दा यो दृष्य मन्दिरमा भगवानको दर्शनका लागि लामबद्ध भएको जस्तो देखिन्छ, तर यो भीड मन्दिर दर्शनको लागि नभएर झापाको अर्जुनधारा धाममा शनिबार आँखा जाँच गराउन आउनेहरुकोे लाइन होे ।

भजन गाउने ओठभन्दा सेवा गर्ने हात महान हुन्छन् भन्ने भनाई धार्मिक ग्रन्थहरुमा नै उल्लेख छ, तर धार्मिक स्थलहरुमा सेवाका कामभन्दा भजन–कीर्तन, पूजा–आजा, पाठ–पुराण धेरै हुने गरेको पाइन्छ । यस बर्ष भने पूर्वको पशुपतिनाथले परिचित अर्जुनधारामा पूजा अनुष्ठानका साथै मानवसेवाको काम पनि भएको छ, यो बर्ष पूजा गर्नेको लाइन मात्र होइन स्वास्थ्य सेवा लिनेको लाइन पूजा गर्नेको भन्दा कम छैन ।

धामको ३७औं वार्षिक अनुष्ठानको अवसरमा अर्जुनधारा जलेश्वर धामको आयोजना र भारतको कलकत्तास्थित महाविर सेवा सदनको प्राविधिक सहयोगमा बिहीबारबाट शुरु भएको निःशुल्क आँखा तथा विकलाङ्ग सेवा शिविरमा सेवा लिनेको संख्यामा समेत वृद्धि भएको छ ।

मंसीर ७ गतेसम्म आँखा शिविर सञ्चालन भएको थियो भने विकलाङ्ग सेवा शिविर अन्तर्गत नाम दर्ता गरी यही मंसीर १३ गतेदेखि २० गतेसम्म कृतिम हातखुट्टा वितरण गरिने धाम समितिले जनाएको छ । शिविरमा डा. जीतेन्द्र गग्लानीसँगै हार्दिक गग्लानी, सान्तनु दास र प्राविधिकहरु पोल्टु मण्डल, राजेश गड्वाल र शौरभ साहूले सेवा दिइरहेका छन् । उनीहरुलाई स्थानीय स्वास्थ्यकर्मीहरुले पनि सहयोग गरिरहेका छन् ।

भारतका विभिन्न स्थानमा स्वास्थ्य सेवा सञ्चालन गर्दै आएको स्वास्थ्य टोलीले नेपालमा पहिलो पटक सेवा प्रवाह गरिरहेको छ । उच्चस्तरको प्रविधिसहित डाक्टर र स्वयम्सेवकको छ जनाको टोली नै लिएर आएको महावीर सेवा सदनको शिविरमा सयौंले आँखा जाँच गरिरहेका छन् ।

विगतका बर्षदेखि बालाचतुर्दशीको अवसरमा धार्मिक अनुष्ठान र धार्मिक मेला आयोजना हुँदै आएको थियो । यस बर्ष पनि विशेष सजीसज्जाका साथ अनुष्ठान र मेलाको आयोजनासँगै बृहत स्वास्थ्य शिविरमा तीन हजार पाँच सयभन्दा बढीले सेवा लिइसकेका छन् । पाँच हजार जनाभन्दा बढीको आँखा परीक्षण, पाँच सय जनालाई आँखाको अवस्था अनुसार चस्मा वितरण र पाँच सय जना विकलाङ्गलाई कृतिम हातखुट्टा वितरण गर्ने लक्ष्य राखिएको धामका अध्यक्ष नविनकुमार गट्टानीले बताएका छन् ।

आगामी दिनमा महावीर सेवा सदनले नेपालमा एक लाख जनालाई चस्मा वितरण तथा १० हजार जनालाई कृतिम हातखुट्टा वितरण गर्ने उद्दश्य राखेको महावीर सेवा सदनका सदस्य राजेश गड्वालले जानकारी दिएका छन् । विशेषगरी विपन्नहरुको लागि सञ्चालन गरिने शिविर शहरभन्दा गाउँ केन्द्रीत रहने बताइएको छ । दान भेटी मात्र संकलन गर्ने होइन मानवलाई प्रत्यक्ष सेवा पुग्ने काम गरेर पनि धर्मको प्रचार र संरक्षण गर्न सकिने सन्देश अर्जुनधाराले दिएको छ ।