विदेशमा ज्यान गुमाएका दुई खोटाङेको शव स्वदेश फर्काउन समस्या

खोटाङ,

कोभिड–१९ को सङ्क्रमण फैलिन नदिन लागू गरिएको लकडाउनका कारण अन्तर्राष्ट्रिय उडान नहुँदा विदेशमै ज्यान गुमाएका दुई खोटाङेको शव स्वदेश फर्काउन समस्या भएको छ । भ्रमणका लागि युएई (दुबई) पुगेको समयमा ज्यान गुमाएका ऐँसेलुखर्क गाउँपालिका–६ ज्यामिरेका सुदीप तामाङ र रोजगारीको सिलसिलामा मलेशियामा ज्यान गुमाएका साकेला गाउँपालिका–३ खिदिमाका कुलबहादुर खत्रीको शव स्वदेश फर्काउन समस्या भएको हो ।

भ्रमण राहदानीमा दुबई पुगेका २२ वर्षीय तामाङको गत फागुन ३० गते र रोजगारीको सिलसिलामा तीन वर्षअघि मलेशिया पुगेका खत्रीको गत चैत २५ गते मृत्यु भएको पारिवारिक स्रोतले जनाएको छ । तामाङको शव हाल दुबईस्थित रसिदिया अस्पतालमा राखिएको जनाइएको छ । हृदयघातका कारण ज्यान गुमाएका सुदीपको नेपालमा समेत ‘लकडाउन’ शुरु भएपछि मात्र मृत्यु भएको जानकारी प्राप्त भएकाले स्वदेश फर्काउन नसकिएको खोटाङ सेवा समाज युएईका अध्यक्ष हिमाल गुरुङले बताउनुभयो । “हामीलाई पनि सुदीपको बारेमा ढिलो गरी जानकारी प्राप्त भयो”, उहाँले भन्नुभयो, “लकडाउनका कारण अन्तर्राष्ट्रिय उडान बन्द भएपछि उनको शव नेपाल पठाउन समस्या भएको छ ।”

सुदीपको शव तत्काल अस्पतालबाट निकाल्न अस्पताल स्रोतले पटक–पटक फोन गरिरहेको भए पनि ‘लकडाउन’का कारण अन्तर्राष्ट्रिय उडान नहुँदा अस्पतालमै राखिएको जनाइएको छ । तत्काल ‘लकडाउन’ खुल्ने सम्भावना नभएको र अस्पतालले बारम्बार शव हटाउन फोन गरिरहेकाले उनको शव यूएईमै अन्त्येष्टी गर्नुपर्ने बाध्यता सिर्जना भएको युएईमै रहनुभएका हिराधन चाम्लिङले बताउनुभयो ।

सुदीपको परिवारले भने उनको शव जसरी भए पनि नेपाल ल्याइदिन विभिन्न निकायसँग याचना गरेको छ । अन्तर्राष्ट्रिय उडान नहुँदा युएईमा हाल ११ नेपाली कामदारको शव रोकिएको जनाइएको छ ।

यस्तै कोरोना भाइरसको महामारी विश्वभर फैलिएपछि अन्तर्राष्ट्रिय उडान नहुँदा खत्रीको शव मलेशियाकै कुवाला पिला अस्पतालमा राखिएको जनाइएको छ । जताततै लकडाउन भएकाले शव नेपाल पठाउन समस्या भएको मलेशियामै रहनुभएका उनका भतिजा तिलाबहादुर खत्रीले जानकारी दिनुभएको छ ।

मलेशियास्थित पेटालिङ जया सेलाङ्गोरस्थित साइम डार्बी प्लान्टेसन बिरहाड कम्पनीमा काम गर्ने क्रममा मोटरसाइकल दुर्घटना हुँदा खत्रीको मृत्यु भएको बताइएको छ । बसिरहेको कोठाबाट केही समयका लागि भनेर बाहिर निस्किएका खत्री नहरमा मोटरसाइकलसँगै डुबिरहेको अवस्थामा मृत फेला परेका थिए ।

रोजगारीकै सिलसिलामा कतारमा दुई वर्ष बिताएर घर फर्किएका खत्री पुनः मलेशिया पुगेका थिए । आर्थिकरूपमा विपन्न जन्मिएका मृतक खत्रीको घरमा श्रीमतीसहित पाँच छोरी र दुई छोरा रहेका स्थानीयवासीले बताएका छन् । कमाएर खुवाउने घरमुलीको रोजगारीको सिलसिलामा विदेशमै ज्यान गएपछि आश्रित परिवारको बिचल्ली भएको गाउँपालिका प्रमुख अर्जुनकुमार खड्का ‘झङ्कार’ले बताउनुभएको छ । मृतक परिवारलाई शव ल्याउन तथा परिवार व्यवस्थापनका लागि गाउँपालिकाको तर्फबाट आवश्यक सहयोग गरिने जनाइएको छ ।

सरकारले लागू गरेको लकडाउनलाई जिल्लामा पनि प्रभावकारी बनाउन उच्च सुरक्षा सतर्कता अपनाइएको जिल्ला सुरक्षा समितिका संयोजक एवं प्रमुख जिल्ला अधिकारी शालिग्राम शर्मा पौडेलले बताउनुभयो । लकडाउन पूर्णपालन गराउन दश स्थानीय तह रहेको जिल्लाका मुख्यमुख्य प्रवेशद्वारमा अस्थायी यात्रु सहायता कक्ष खडा गरेर चेकजाँचमा कडाइ गरिएको प्रजिअ पौडेलले जानकारी दिनुभएको छ ।